GMRC ni Presidente Duterte
Daghang nihangop sa sugo ni Education Secretary Leonor Briones nga itudlo pagbalik ang Good Manners and Right Conduct (GMRC) sa mga eskuylahan sa elementarya ug high school. Nga mao’y sentro sa among Pulso sa Arangkada sa dyAB Abante Pa, Bisaya! ug Maayong Buntag Kapamilya (MBK) sa Channel 3 gahapon sa buntag.
Kasagaran sa mga tigpaminaw nga senior citizens nipadayag og kahidlaw sa karaang panahon nga ang mga bata matinahuron sa mga nag-una nila sa duyan. Lahi karon nga di lang kay labay-labayan sila sayun-sayunon pa g’yud sa pagtubag ug pagsukol.
* * *
Gipahibawo sa Departamento sa Edukasyon (DepEd) nga bansay-bansayon ang mga magtutudlo sa pagmatuto sa mga tinun-an di lang sa mga leksiyon sa eskuylahan kon dili apil na sa maayong pamatasan ug mga mithi. Gihagit sab ang mga magtutudlo pagpahaom sa ilang mga leksiyon sa dagkong kausaban sa bag-ong panahon.
Gipasabot ni Briones nga ang GMRC isukip sa duha ka subjects:
• Edukasyon sa Pagpakatao nga motudlo sa gugma sa kaugalingon, pamilya, katilingban, nasud, ug Labaw’ng Makagagahom; ug
• Araling Panlipunan nga motudlo sa pakigbisog alang sa nasudnong kaugalingnan ug national identity.
* * *
Sa wa pa si Briones, si Isidro Cariño, kalihim sa edukasyon sa pamunoan ni anhing presidente Corazon Aquino, nipatudlo sa GMRC isip kabahin sa Values Education niadtong tuig tingtungha 1991-1992. Ang GMRC may usa ka unit nga kredito sa matag upat ka ang-ang sa karaang high school. Ang grado sa GMRC gipasikad sa taras ug panlihuk-lihok sa mga tinun-an.
Ambot nganong wa na mapadayon ang nasugdan ni Cariño. Ang nipuli niya nga si Armand Fabella sa pamunoan ni kanhi presidente Fidel Ramos wa na maghisgot sa GMRC.
* * *
Labaw sa paghimong kabahin sa ilang mga leksiyon sa GMRC, gidasig sa DepEd ang mga magtutudlo sa pagpakita sa gamhanan nga mga sanglitanan pinaagi sa aktuwal nga pagkamatinahuron sa tanan nilang ika-uban sa inadlaw-adlaw nga kalihokan sud ug gawas sa classrooms.
Mas gamhanan nga mensahe alang sa linghod nga mga tinun-an kon ang ilang Teacher-in-Chief nga si Presidente Rodrigo Duterte, sa iyang matag adlaw nga lihok ug sulti nga mabantang sa tibuok nasud ug sa tanang katawhan, mopasundayag sa labing batakan nga mga lagda sa GMRC.
- Latest
