Mga tugon sa Piyesta Senyor

Nipahibawo si Pagasa Visayas Director Oscar Tabada nga mopakita nang adlaw karong Dominggo atol sa pagsaulog sa Piyesta Senyor sa Sugbo. Kini tungod sa pagkahilis na sa duha ka duha ka hugpong sa bugnawng hangin nga nisangpot sa pagpanag-om og pag-uwan sa tibuok semana dayong abot sa tinuig nga pangilin ni Sr. Sto. Niño.

Mas maayo nga puti ug nipis nga t-shirt ang isul-ob kon nagplanong mosaksi sa Sinulog Grand Parade. Puti aron masagang ang kainit sa adlaw ug nipis aron nga di magkadusingot tungod sa gikabalak-an nga kaalimuot sa palibot.

***

Bisan nipasalig ang Pagasa nga gamay ra ang kahigayonan sa uwan, mas maayo nga gomang sapatos ang isul-ob. Aron mas sayon nga ilakaw bisan layo ang baktasunon. Di sab hasol bisan matamakan kon maghuot nang mga manan-away, lahi sa mga tsinelas nga mahimong matangtang, mawagtang o mabitas dayon.

Kon simbako magbunok ang uwan, mas maayo pa gyud nga di mag-medyas. Dihang naabtan ko og kusog nga uwan samtang naglakaw sa Colon sa downtown area sa Dakbayan sa Sugbo pila ka Sinulog na ang nilabay, sayon ang pag-ubog sa lawom ug lagom nga baha ug dali rang manghimasa sa tiil ug manghugas sa sapatos inigkahuman.

***

Labing luwas ug lamian nga pagkaon atol sa Piyesta Senyor mao ang bawon nga pagkaon. Nitagam na ko sa pagtuo sa mga istorya nga, bisan di na maghikay ang kasagaran sa mga molupyo sa dakbayan, daghan gihapon ang magkumbira sa dan R.R. Landon ug sa mga barangay sa Pasil ug Suba.

Nindot paminawon ang pasalig hangtod nga makaamgo ka nga wa diay kaila sa kabalayan nga naghikay. Di kang kapaabot nga agdahon og kaon. Samang di sab maayong pamatasan ang pagpanuktok sa malabyan nga mga bay nga nangalimyon ang lamian nga mga putahe. Kay labaw nga wa kaila nimo ug di andam nga mosalig dayon og dayo ang mga tagbalay.

***

Mas maayo sab nga unahon pagduaw ang Basilica del Sto. Niño. Aron nga di malaktawan ang tinuod nga sentro sa Piyesta Senyor. Gawas nga sayon rang baktason gikan sa solemne nga basilica paingon sa alingugngog nga mga ruta sa parada, angayang panaminan ang sulti sa usa ka dumuduong gikan sa Iloilo.

Kinsa nangagpas nga usa sa mga hinungdan sa paglambo sa Sugbo mao nga wa makalimot ang mga Sugbuanon sa relihiyusong aspeto sa Piyesta Senyor bisan sa kabantogan na sa Sinulog. Lahi sa Iloilo nga natingob ang tanang atensiyon sa Dinagyang. Hinikalimtan ang relihiyusong kalihokan nga gitawag nila og Candelaria. Masulub-on siya nga nitug-an nga di gani katunga sa simbahan ang mga makahinumdom pagpangaliya atol sa ilang kapiyestahan.

***

Email: [email protected]