Wa tay ikabawos?

Nagpanon ang nagpakabana nga senior citizens paingon sa Ayala Activity Center aron pagpadayag sa ilang pagmahay sa kakuwang sa determinasyon sa kagamhanan pagpatuman sa nagnihit nang daan nilang mga benepisyo. Ang nahan-okan sa ilang mga pangutana maong mga representante sa Government Service Insurance System (GSIS) ug Bureau of Internal Revenue (BIR) nga nanambong sa sinemanang Kulokabildo.Com sa DYAB Abante Bisaya. Nag-una nilang mga reklamo:

• Kalangay sa ilang pensions ug ubang mga benepisyo bisan sa gipasiatab nga computerization sa GSIS;

• Kahasol sa pagkuha ug pagpa-renew matag tuig sa e-Card; ug

• Ang padayong pagdumili sa mga botika paghatag sa 20% nga diskuwento sa ilang gipamalit nga mga tambal.

* * *

Si GSIS Senior Vice Pres. Alex M. Valencerina maoy nangu sa dagkong mga opisyal sa GSIS nga nanubag sa mga reklamo, nga ang kasagaran masuk-anon, gikan sa mga sakop sa nagkalainlaing kahugpongan sa senior citizens sa Dakbayan sa Sugbo:

• Ang kalangay sa pensions, Christmas gifts ug ubang mga benepisyo nagumikan sa nagpadayong paghapsay sa bag-ong computerized system nga ilang gipatuman, apil na sa pagsusi sa pensioners nga dugay nang nangamatay o nagminyo o nagpuyo-puyo;

• Ang mga kawani na sa GSIS ang molibot sa tibuok Sugbo aron pagpanghatag og e-Card sa tanan nilang mga sakop, labi na gyod sa retirees nga duna nay kakulian sa panglawas;

• Sa mga lungsod nga way automated teller machines (ATM), ang e-Card mahimong i-swipe sa mga makina sa M. Lhuillier pawnshops nga nahimutang bisan sa labing suok nga mga bahin sa Sugbo ug sa nasud; ug

• Ang e-Card mahimo nang luwas nga kahimanan sa pagsud sa uban pang mga transaksiyon uban sa GSIS.

* * *

Si Zorahaida dela Cruz sa BIR nga wa nay sukaranan ang bagulbol sa mga botika niadto nga langay ang refund kay ang 20% nga diskuwento nga gihatag kuhaon na mang daan sa ilang kita sa wa pay buhis, o gross income. Gihagit niya ang senior citizens sa pagreklamo ug pagkiha sa mga bay patigayon nga padayong nagpaugat paglapas sa klaro na kaayong mga lagda. Apan si Barangay Kapitan Felix Abella sa Labangon, nga maoy pangu sa senior citizens Central Visayas federation, nikumpisal nga nitagam na sila sa pagsuway nilag kiha niadto-nakabayad sila sa dakong filing fee ug nakagasto pag abogado apan nabasura rang ilang kaso kay gibayran lag P10,000 sa sinumbong nga botika ang biktima nga mao ray ilang saksi.

* * *

Dayong human sa forum, nagkauyon hinuong mga nanambong sa pagtinabangay aron pagpanalipod sa ilang mga katungod ug mga benepisyo:

• Magtinabangay ang GSIS ug senior citizens sa kalungsoran pag-ila sa mga pekeng pensioners;

• Tabangan sa BIR ug ubang ahensiya ang mas pagpalig-on sa pagdokumento sa kalapasan sa mga botika.

* * *

Email:[email protected]