Kolorum sa MCIAA?

Ang Civil Service Commission (CSC) pormal nang nideklarar sa katungdanan pagka general manager sa Mactan-Cebu International Airport Authority (MCIAA) nga bakante. Kini tungod sa kapakyas sa MCIAA board pagsumiter sa ilang unanimous nga reappointment ni Heneral Adelberto Yap ngadto sa CSC sud sa 30 ka adlaw. Napupos nang usa ka tuig nga termino ni Yap niadtong Pebrero 22. Ang reappointment sa board nakalugway sa iyang pagduma sa MCIAA og usa lang ka buwan.

Matod ni CSC 7 Director David Cabanag Jr. karong napupos nang lugway, di na makapadayon si Yap sa iyang mga gimbuhaton sa MCIAA. Gawas nga di na siyang kakobra sa iyang suholan ug mga benepisyo, di na sab siyang kasud og mga transaksiyon ni kapirma og bisan unsang dokumento alang sa MCIAA.

* * *

Nganong human sila nagkahiusa pagpangugat pagdupa sa katakos ni Yap napakyas mang MCIAA board pagsumiter sa iyang reappointment ngadto sa CSC?:

• Nahadlok ba sila sa kasong ilang giatubang sa Visayas Ombudsman nga namasangil nga ilang gitudlo si Yap bisan sa pasidaan sa CSC nga di siya qualified sa katungdanan?;

• Tinuod bang nagdumili si Transportation Secretary Leandro Mendoza, ang tsirman sa MCIAA board, pagpirma sa reappointment ni Yap kay napaso og apil sa iyang gisumiter sa CSC nga kopya sa MCIAA charter, nga gidudahang gipalsipikar aron pagpabor ni Yap?; o

• Gilaktawan na lang gyod nilang CSC uban ang aroganteng pagsalig nga di sila dutlan sa mga balaod sa civil service kay gipanghinaot nga ipamugos ni Pres. Arroyo ang iyang nominasyon ni Yap?

* * *

Bisan unsaon og tuwad ang balaod, kolorum na si Yap. Wa na siyay katungod nga magpabilin og bisan usa na lang ka gutling sa katungdanan. Gawas nga nameligro siya ug ang mga sakop sa MCIAA board nga masilotan, ang iyang paugat makapahimutang sab sa kakuyaw nga mabasura ang tanang mga transaksiyon sa MCIAA ubos sa iyang pagduma.

Kon nawad-an na siyag bisan gamay na lang uwaw alang sa iyang kaugalingon ug sa mga sakop sa iyang pamilya, di ba diay maikog si Yap nga maangin ang tibuok MCIAA, apil nang kinatibuk-ang pangandam alang sa ASEAN summit karong Disyembre, sa bagtok nga kahakog niya sa gahom?

* * *

Kon unsa may gibundak ni Yap nila nga nakapalingiw sa mga sakop sa MCIAA board sa tanan niyang kakuwangan niadto, di kaha maayong mosugod na sila karon pagpatigbabaw sa kaayuhan sa kinabag-an pinaagi sa pagtugyan sa MCIAA ngadto sa mas takos nga tagduma?

Nahadlok hinuon kong maglisod nang mga Sugbuanon pagpasaylo sa ilang bisyo pagyatak sa balaod. Napaso na sila niadto sa samang kontrobersiya ni kanhi MCIAA gen. manager Angel Verdan. Duna gyod tingali minilyon ug usa ka hinungdan nganong gisugba na sang ilang kaligdong.

* * *

Email:[email protected]