198 motor na walang rehistro at plaka hinuli ng QCPD
MANILA, Philippines — Nasa impounding area na ng Quezon City Police District (QCPD) ang nasa 198 na motorsiklo na hinuli dahil sa walang rehistro at walang mga plate number.
Ito ang sinabi ni QCPD director, P/Brig. Gen. Redrico Maranan na resulta ng 3-Day One Time Big Time (OTBT) operations ng Quezon City Police District (QCPD) katuwang ang iba’t ibang police stations nito.
Ayon kay Maranan, isinagawa ang 3-Day OTBT mula April 26-28, 2024 sa serye ng anti-criminality checkpoints ng QCPD.
Sa mga na-impound na motor, 112 ang mula sa operasyon ng District Tactical Motorized Unit (DTMU); 17 naman sa District Traffic Enforcement Unit (DTEU), 11 sa District Anti-Carnapping Unit (DACU), at 58 motor naman mula sa PS 1-16.
Babala ni Maranan na lahat ng iligal katulad nang paggamit ng motor na hindi rehistrado at walang plate number ay huhulihin lalo na sa mga walang lisensya.
Kadalasang aniyang nagagamit sa krimen ang mga walang rehistro at walang plaka na mga motorsiklo.
- Latest
