Taxi driver, bebot huli sa higit P300K shabu
MANILA, Philippines — Arestado ang isang taxi driver at kasamang babae sa mas pinaigting na Anti-illegal Drugs Campaign ng National Capital Region Police Office (NCRPO) matapos ang isinagawang buy-bust operation sa Muntinlupa City, Sabado ng umaga.
Kinilala ni NCRPO chief, PMaj. Gen. Jose Melencio Nartatez Jr. ang mga suspek na sina Jenard Abdula Mansur alyas “Alex”, 38, taxi driver, ng Waterfun, C5 Brgy. Pinagsama, Taguig City, at Jeanyrose Villarama Mokamad alyas “Jen”, 37, ng Palar Village, Brgy. Pinagsama, Taguig City.
Sa ulat, dakong alas-7:15 ng umaga ng Marso 9, 2024 nang isagawa ang buy-bust ng mga operatiba ng Station Drug Enforcement Unit (SDEU) ng Muntinlupa City Police sa kahabaan ng Biazon Road, Brgy. Poblacion.
Matapos makabili ang poser buyer ng shabu, agad na inaresto ang dalawa at nasamsam sa kanila ang may 52 gramo ng hinihinalang shabu na nagkakahalaga ng P353,600, marked money at boodle money, at isang puting Honda PCX (226U2X).
Sa beripikasyon sa Crime Information, Reporting and Analysis System (CIRAS), natuklasang si “Jen” ay may dating record sa paglabag sa Section 5 at 11 Article II ng R.A. 9165 noong Setyembre 04, 2021.
- Latest
