Number coding sa Metro Manila, suspendido muna - MMDA
Dahil sa transport strike
MANILA, Philippines — Nagpasya ang Metropolitan Manila Development Authority (MMDA) na suspendihin muna ang number coding scheme sa Metro Manila, kasunod na rin ng ikinakasang 3-araw na tigil-pasada ng transport group na Pinagkaisang Samahan ng mga Tusper at Operators Nationwide (PISTON) simula ngayong Lunes, Nobyembre 20.
Mismong si MMDA Chairman Don Artes ang nag-anunsiyo ng suspensiyon ng number coding dahil sa inaasahang epekto ng tigil-pasada sa malaking bahagi ng Kamaynilaan.
“Yes, suspended,” ayon pa kay Artes.
Sinabi ni Artes na asahan na ng mga commuters ang mas masikip na daloy ng trapiko ngayong Lunes.
Payo pa niya sa publiko, kung hindi rin lang naman importante ang kanilang lakad ay mas makabubuting ipagpaliban na lamang ito at huwag nang lumabas ng bahay.
Nilinaw naman ni Artes, na sa ngayon, ang suspensiyon ng coding scheme ay ngayon Lunes lamang na unang araw ng tigil-pasada habang sa Makati City ay patuloy pa rin itong ipatutupad.
Pag-aaralan pa aniya nila kung palalawigin pa ang suspension ng number coding scheme sa susunod na dalawang araw ng transport strike.
- Latest
