85-anyos na lolo, patay sa mixer truck
MANILA, Philippines — Patay ang 85-anyos na Fil-Chinese makaraang mabundol ng isang cement mixer truck habang nagtatangkang tumawid sa may Recto Avenue sa Maynila kamakalawa ng hapon.
Kinilala ang nasawi na si Donato Ang, ng Carvajal St., Binondo, Manila.
Sumuko naman sa pulisya ang suspek na kinilalang si Edilberto Aballe, 48, ng Lucasan Street, C6 Road, Brgy. Wawa, Taguig City.
Sa inisyal na ulat ng Meisic Police Station 11 ng Manila Police District, dakong alas-5:30 ng hapon nang maganap ang insidente sa kanto ng CM Recto Avenue at T. Mapua Street sa Sta. Cruz, ng naturang siyudad.
Binabagtas ng concrete mixer truck na minamaneho ni Aballe ang kahabaan ng Recto Avenue nang mabundol niya ang biktima pagsapit ng T. Mapua Street. Nang masakote ng mga pulis, ikinatwiran ng suspek na hindi umano niya napansin ang matanda sa kalsada.
Nahaharap ngayon sa kasong homicide through reckless imprudence si Aballe sa city prosecutor’s office ng Maynila.
- Latest