MANILA, Philippines — Hindi lamang produktong petrolyo ang tumaas ang presyo sa pagsisimula ng buwan ng Agosto kundi tumaas din ang presyo ng LPG ng may P50 sa kada tangke, kahapon.
Sa abiso ng Petron Corporation ang ginawa nilang pagtaas ay umaabot ng P4.55 kada kilo o may P50 taas sa bawat tangke na may laman na 11 kilo samantalang ang presyo ng AutoLPG ay tumaas sa halagang P2.54 kada litro.
Ayon sa Petron, ang pagtaas ay bunga ng international contract price ng LPG para sa buwan ng Agosto.
Napaulat din na ang Solane-branded LPG ay tumaas din ang presyo ng P4.55 kada kilo.
Wala namang abiso ang ibang kompanya ng langis kung may taas presyo rin sila sa produktong LPG.