Nananamantala sa PWD IDs, binalaan ni Mayor Joy
MANILA, Philippines — Binalaan ni Quezon City Mayor Joy Belmonte ang mga nanlolokong indibidwal na gumagamit ng persons with disability (PWD) identification card sa lungsod.
Ayon kay Mayor Belmonte, nagpatupad na ang Persons with Disability Affairs Office (QC PDAO) ng mas mahigpit na verification processes para mahuli ang ilang indibiduwal na nagpapanggap na mayroong kapansanan.
“The improper use of PWD IDs to obtain discounts, by individuals who are not legitimate PWDs is completely unacceptable. To address this issue, we have implemented an automated registration system which makes the process more efficient and secure,” pahayag ni Belmonte.
Idinagdag pa ng alkade, gumagamit na ngayon ang bagong PWD ID registration system ng online portal QC E-Services kung saan pinagsusumite na ang mga aplikante ng mga kaukulang dokumento para patunayan ang disability.
Sa ganitong paraan, sinabi ni Belmonte na mawawala na ang padrino at mga fixers hinggil dito.
Nasa 78,000 ang PWD ID holders sa QC bago tumama ang pandemya sa COVID-19 pero matapos ipatupad ang automated system, nasa 52,000 na lamang ito.
Ayon pa kay Belmonte, nabuking din na sa 7,000 na na-reject na aplikante, karamihan sa mga ito ay gumagamit ng mga pekeng medical certificates.
Samantala, sinabi ni Belmonte na binibigyang prayoridad na ngayon ng lokal na pamahalaan ang pagbibigay ng accessibility sa mga PWD sa pamamagitan ng paglalagay ng mga ramps sa mga sidewalks.
- Latest
