2 menor-de-edad na nanaksak ng kapwa minor, arestado
MANILA, Philippines — Nadakip ng mga awtoridad ang dalawang menor-de-edad na sinasabing suspek sa pananaksak sa isang kapwa nila minor sa Brgy. Bungad, Quezon City kamakalawa ng gabi.
Hindi na pinangalanan ang mga suspek na nasa edad 13 at 15-anyos lamang.
Batay sa ulat ng QCPD, nabatid na dakong alas-7:15 ng gabi kamakalawa nang maganap ang krimen sa tapat ng Judge Juan Luna High School sa Brgy. Bungad, QC.
May hinihintay lamang umano ang biktima sa naturang lugar nang bigla na lang sumulpot ang grupo ng mga suspek, na pawang mga lalaki at sa ‘di pa batid na kadahilanan ay biglang sinuntok ng isa sa kanila ang biktima.
Hindi pa nasiyahan, pinalo pa umano ng isa ng baseball bat ang ulo ng biktima at saka ito sinaksak sa katawan.
Nakita naman ng kapatid na babae ng biktima ang pangyayari kaya’t kaagad itong humingi ng tulong.
Mabilis ding isinugod ng mga miyembro ng Barangay Police Safety Officers (BPSO) ang biktima sa Quezon City General Hospital (QCGH) upang malapatan ng lunas.
Naaresto rin nila ang mga suspek sa isinagawang follow-up operation.
Ang mga suspek ay itinurn-over na rin kaagad sa tanggapan ng City Social Welfare and Development (CSWD) para sa kaukulang disposisyon.
- Latest
