Budget cut sa PGH, inalmahan
MANILA, Philippines — Pinalagan ng unyon ng mga manggagawa ng Philippine General Hospital (PGH) ang pinababang panukalang pondo para sa pagamutan sa 2023 na tinawag nilang hindi katanggap-tanggap at nakakabahala.
“Una sa lahat ang unang maapektuhan po ng budget cut sa PGH ay ‘yung serbisyo na ibinibigay namin sa mga pasyente,” ayon kay ALL UP Workers Union-Manila/PGH president Karen Faurillo.
Base sa ‘spending plan’ ng gobyerno, kakaltasan ng P890 milyon ang pondo ng PGH. Mula sa kasalukuyang P6.3 bilyong pondo nito ay magiging P5.4 bilyon na lamang sa 2023.
Iginiit ni Faurillo na mas higit na kailangan ng PGH ng pondo habang tumatransisyon ang bansa sa ‘new normal’ dahil sa pagiging pinakamalaking ‘COVID-19 referral facility’ nito. Mas kakailanganin pa nga umano ng PGH ng dagdag na P10 bilyong pondo.
Nang tumama ang pandemya, nakita pa umano lalo ang pangangailangan na mag-upgrade ng PGH ng pasilidad, kagamitan at iba pang resources.
Tinawag nilang ‘anti-poor’ at ‘anti-health workers’ ang pagbawas sa pondo lalo’t nasa 300 contractual at job orders na manggagawa ang naghihintay na ma-regular sila sa trabaho.
- Latest
