Miyembro ng ‘Arao criminal gang’, arestado

MANILA, Philippines — Arestado ang isang 25-anyos na lalaking miyembro umano ng notoryus na ‘Bobby Arao Robbery Group’ na responsable sa serye ng nakawan sa  Taguig City at karatig lugar, kamakalawa ng hapon.

Kinilala ni  Southern Police District (SPD) Director, P/Brig. General Jimili Macaraeg ang suspek na si John Carlo Marces, alyas Atabs, mekaniko.

Sa ulat, nakatanggap ng impormasyon ang Taguig City Police Station hinggil sa presensya ng isang armadong lalaki sa Ganchero St., Brgy. Central Bicutan, Taguig City.

Dakong alas-4:30 ng hapon nang puntahan upang beripikahin ang tip ng concerned citizen kung saan inabutan pa sa lugar ang suspek na nakuhanan ng isang kalibre .38 Armscor revolver na may 3 bala at sa pagrikisa ay nadiskubre rin sa kaniya ang isang granada.

Ipinasusuri na ang mga nakumpiskang baril at granada sa Firearms and Explosive Division, habang inihahanda ang reklamo kaugnay ng illegal possession of firearms and explosives.