Tamang pagtatapon ng basura, apela ni Mayor Lacuna

MANILA, Philippines — Nanawagan si Manila Mayor Honey Lacuna sa mga residente ng Maynila na tulungan ang kanilang lokal na pamahalaan na malutas ang mga problema sa pagbaha sa lungsod sa pamamagitan lamang ng pagsasagawa ng tamang pagtatapon ng basura, lalo na ngayong tag-ulan.

Aniya, ang department of public services (DPS) ay inatasan niyang magsagawa ng tuluy-tuloy na declogging at paglilinis ng lahat ng daluyan ng tubig upang maiwasan ang pagbaha.

Iniutos niya rin ang patuloy na koordinasyon sa Metro Manila Development Authority (MMDA) kung saan nasasakupan ang flood control program ng lungsod.

“Iniatas natin ang tuluy-tuloy na paglilinis ng mga estero para maiwasan ang pagbaha. Ganundin ang continuous coordination with the MMDA na paganahin ang mga pumping station ‘pag may malakas na ulan and flash flooding,” anang alkalde.

Ang paglilinis sa mga pangunahing drainage at esteros ay ginagawa nang may pakikipag-ugnayan sa Department of Public Works and Highways (DPWH).

Nakalinya na rin ang planong pag-upgrade sa mga kalsada na naiwang mababa sa pagpapataas naman ng mga national road.

 “Yun naman pong mga kalye na luma at ina­dequate na ang size ng drainage at ‘yung iba pong kalye na naiwanan sa pagtaas ng mga national roads ay isinasama natin sa proposed upgrading, drainage improvement and concreting projects,” aniya pa.