Repair at maintenance work ng telcos, suspendido - NTC

MANILA, Philippines — Sinuspinde ng  pamunuan ng National Telecommunications Commission (NTC) ang lahat ng network repairs at maintenance  work  ng lahat ng  telecommunications companies  at iba pang service providers  sa bansa sa panahon ng eleksiyon .

Sa ipinalabas na memorandum ng NTC, sakop ng  suspension ang lahat ng pagawain ng lahat ng telcos at service providers mula nitong May 4 2022 hanggang  May 14, 2022.

Ikinatwiran ng NTC sa kautusan nito na malaki ang gagampanang papel ng lahat ng telecommunications services at service providers sa panahon ng eleksyon .

Batay sa Republic Act No. 8436, kinakailangang ang election results ng  Automated Election System (AES)  ay dapat na  electronically transmitted at kinakailangan ang koordinasyon sa bawat isa at sa ibat ibang government agencies, accredited citizens’ arms, volunteers, poll watchers at mga kandidato ngayong halalan.

Dahil dito, gagampanan ang papel sa halalan ang lahat  public telecommunication entities (PTEs), Internet Service Providers (ISPs), Value-Added Service Providers (ASPs), at Satellite Service Providers (SSPs) para matiyak na ang lahat ng  network repairs at maintenance ay makumpleto bago ang  May  3, 2022.

Oras na magkaroon ng aberya,  dapat na ipaalam ng  PTEs, ISPs, ASPs at SSPs  sa NTC ang gagawing  emergency repair at maintenance , impact ng serbisyo at apektadong lugar ganundin kung ano ang resulta ng pagkumpletong solosyon sa naging aberya.