Bodega ng tela sa Divisoria, nasunog

MANILA, Philippines — Natupok ang isang bodega na imbakan ng tela sa loob ng isang mall sa Divisoria sa Tondo, Maynila, Huwe­bes ng madaling araw.

Sa ulat ng Bureau of Fire Protection-Manila, dakong alas-12:25 ng madaling araw nang unang sumiklab ang apoy sa bodega na pag-aari ng Golden Ox Inc. na nasa loob ng Ylaya 939 Shopping Mall sa  Divisoria. Alas-12:28 ng madaling araw nang itaas ang sunog sa ikalawang alarma.

Batay sa ulat ni F/Insp.Michael Ignacio, Ground Commander ng BFP, nanggaling ang maitim na usok sa bandang likurang  bahagi ng bodega  sa ground floor ng gusali.

Agad na nakares­ponde ang tinatayang 14 na fire trucks ng BFP at 40 trucks ng mga fire volunteers kaya madaling naa­pula ang apoy.

Dakong alas-3:28 ng madaling araw nang makontrol ang pagkalat ng apoy at alas-5:16 ng madaling araw nang ideklarang fire out ito.

Tinatayang aabot sa P5 milyon ang ha­laga ng ari-arian na natupok sa insidente habang walang naiulat na nasaktan.

Patuloy naman ang imbestigasyon ng BFP para matukoy ang sanhi ng apoy at malaman kung sinadya ba ito.