Pamamahagi ng fuel subsidy sa jeepney drivers, umarangkada na - LTFRB
MANILA, Philippines — Nagsimula nang magkaloob ang pamahalaan ng fuel subsidies na may halagang P1 bilyon para sa may 136,000 driver ng pampasaherong jeep upang maibsan ang epektong dulot sa patuloy na pagtaas ng halaga ng petroleum products.
Ito ay makaraang ilunsad ng Land Transportation Franchising and Regulatory Board (LTFRB) ang ‘Pantawid Pasada Fuel Program’ (PPP) na tutulong sa mga driver na apektado ang kabuhayan ng oil price hike.
“Bagama’t nakita natin sa nakaraang ilang linggo, bahagyang bumaba ang presyo ng krudo at gasolina pero mataas pa rin ang presyo kumpara sa umpisa ng taong ito. Kailangang tulungan natin ang transport sector, lalung-lalo na ang mga tsuper at operator ng public utility jeepneys,” pahayag ni LTFRB chairman Martin Delgra.
Anya ang subsidy ay hindi lamang para mabawasan ang gastusin sa pagkakarga ng krudo ng mga driver ng jeep kundi upang matiyak na may maghahatid sundo sa mga mananakay ngayong panahon ng pandemic.
Sinabi ni Delgra na may matatanggap na P7,200 ang bawat sasakyan na one-time subsidy at ang pondo ay ipapasok sa PPP cards ng mga driver.
Nilinaw ng LTFRB na ang subsidy ay maaari lamang magamit na pambayad sa ikakargang krudo ng mga jeep sa siyam na participating petroleum retail outlets o gasoline stations.
Ang mga lalabag sa paggamit ng PPP cards ay awtomatikong aalisan ng anumang benepisyo sa pamahalaan at tatanggalin sa subsidy program na nasa ilalim ng Tax Reform for Acceleration and Inclusion (TRAIN) Law.
Ang LTFRB ay may 85,000 active PPP card holders at 78,000 dito ay tumanggap na ng kanilang subsidies.
Sinabi ni Delgra na ang mga wala pang cards ay maghintay lamang dahil patuloy ang pagpoproseso dito ng Land Bank of the Philippines para sa printing at pamamahagi nito.
- Latest