Pila ng mga nagpaparehistro mahaba pa rin

MANILA, Philippines — Isang araw bago ang pagsisimula ng paghahain ng kandidatura para sa 2022 Local at National Elections, mahaba pa rin ang pila ng mga nais magparehistro para makaboto.

Sa Trinoma Mall sa Edsa, Quezon City sinisikap ng ilang bagong botante na humabol sa pagpaparehistro.

Ito ay kahit nagdesisyon na ang Commission on Election (Comelec) na palalawigin hanggang October 30, 2021 ang registration.

Samantala sa abiso ng Comelec, hanggang kahapon na lamang sila tumanggap ng mga magpaparehistro dahil pansamantalang ititigil nila ito para bigyang daan ang paghahain ng kandidatura na magsisimula ngayon hanggang October 8.

Muling bubuksan ang ­voter’s registration sa October 11-30.