Wanted na Amerikana natimbog sa Maynila

MANILA, Philippines — Dinakip ng mga tauhan ng Bureau of Immigration (BI) ang isang babaeng American national na wanted sa Estados Unidos dahil sa kinasasangkutang kaso sa “child custody”.

Kinilala ni Immigration Commissioner Jaime Morente ang dinakip na si Cyndi Mamuad Mesina, 54.  Inaresto siya ng mga tauhan ng BI-Fugitive Search Unit sa may Roxas Blvd., Ermita, Maynila nitong Hunyo 24.

Nabatid na nagpalabas ng “mission order” si Morente base sa kahilingan ng US authorities para madakip si Mesina na nahaharap sa warrant of arrest na inisyu ng Superior Court of California.

Nahaharap din sa ‘contempt of court’ si Mesina dahil sa ‘child abduction o depravation custody’ sa isang paslit.

Sinabi ni Morente na isa ring ‘overstaying alien’ si Mesina at walang balidong travel documents.  Nakaditine siya ngayon sa BI Detention Center sa Camp Bagong Diwa sa Taguig City habang hinihintay ang kaniyang deportasyon.