2 sangkot sa bentahan ng bakuna, kinasuhan na
MANILA, Philippines — Tuluyan nang kinasuhan ng PNP-Criminal Investigation and Detection Group (PNP-CIDG) sa Mandaluyong City Prosecutors’ Office ang dalawang suspek sa kontrobersiyal na bentahan ng ‘bakuna’.
Ayon kay PNP-CIDG Director, BGen. Albert Ferro, kasong paglabag sa article 315 ng Revised Penal Code o estafa, paglabag sa anti-red tape law of 2007 at paglabag sa anti-cybercrime law ang isinampa laban kina Cycle Cedric Bonifacio at Melvin Polo Gutierrez.
Nilinaw ni Ferro na hindi empleyado ng Mandaluyong City Hall sina Bonifacio at Gutierrez taliwas sa naunang lumabas na balita.
Una nang ibinunyag ng Vlogger na si Nina Elaine Dizon ang maanomalyang transaksyon kung saan maaaring makakuha ng slot sa bakuna sa mga lungsod ng Mandaluyong at San Juan ang mga biktima ng dalawa kumporme ang singil sa brand ng bakuna.
Sa panig naman ni PNP Chief Gen. Guillermo Eleazar na patuloy pa rin ang imbestigasyon ng CIDG kaugnay sa nasabing kaso na posibleng may iba pang mga indibiduwal ang sangkot dito.
” Magsilbing babala sana ito sa iba pang magtatangkang dayain ang sistema ng ating national vaccination program ang ating pagsasampa ng kaso laban kay Bonifacio at Gutierrez,” ani Eleazar.
Paalala naman ni Eleazar sa publiko na libre ang bakuna na ibinibigay ng mga Local Government Unit (LGU), ang kailangan lang ay magparehistro at maghintay kung kailan babakunahan.
- Latest
