DILG: Bago tumama ang bagyo, mga dam buksan na
MANILA, Philippines — Bago pa tumama ang bagyo ay dapat nang buksan ang mga dam upang hindi na makadagdag pa sa mga nararanasang mga pagbaha.
“I think we will propose na in times of calamities and typhoon, dapat merong nagkokontrol diyan. Sino, kailan, bubuksan ang dam,” ayon kay DILG Secretary Eduardo Año.
Matatandaang sa Cagayan, kasabay nang malawakang pagbaha dahil sa bagyong Ulysses, ay anim na gate ng Magat dam ang binuksan na nakadagdag sa mga pagbaha.
“Dapat before the bagyo pwede na tayong magbukas lalo na kung meron tayong forecast kung gaano kalaki ‘yung ulan na darating,” ayon pa kay Año.
Aniya pa, dapat na mabigyan ang National Disaster Risk Reduction and Management Council (NDRRMC) ng awtoridad na kontrolin ang pagbubukas ng mga dam, partikular na kung may bagyo.
“I will propose na pag-usapan namin sa NDRRMC na sa times ng calamity o typhoon, ang NDRRMC ang magbibigay ng approval kung kailan pwede magbukas, ilang gate, para controlled natin,” aniya pa.
“Yan ang sinasabi ng ating mga LGUs, katulad sa Region IV, III at NCR na nakadagdag talaga ng pagbaha ang pagbubukas ng dam,” aniya pa.
- Latest
