LRVs ng MRT-3, bumibiyahe na rin!
MANILA, Philippines — Magandang balita para sa mga train commuters dahil nagsimula na ring tumakbo kahapon sa mainline ng Metro Rail Transit Line 3 (MRT-3) ang general overhauled Light Rail Vehicles (LRVs) o bagon ng MRT-3, na binubuo ng isang train set na may tatlong bagon.
Ayon sa Department of Transportation (DOTr), ito ay dagdag sa 22 train sets, kabilang ang 19 CKD train sets at 3 Dalian train sets, na operational at tumatakbo sa linya ng MRT-3.
Nabatid na ang mga naturang bagong overhaul na mga bagon ay isinailalim sa simulation run ng pamunuan ng MRT-3 at sinubukang patakbuhin sa bilis na 50kph noong Oktubre 29, 2020.
Layunin nitong siguruhing ligtas na gamitin ang mga bagon bago tuluyang idagdag sa mga operational train sets na tumatakbo sa linya.
Nauna rito, itinaas ang operating speed ng mga tren sa 50kph noong Nobyembre 2, 2020, mula sa dating 40kph lamang noong Oktubre 2020.
Ayon sa MRT-3, dahil sa mas mabilis na takbo ng tren, nabawasan na ang average passenger waiting time para sa pagdating sa istasyon ng mga tren sa apat na minuto na lamang, mula sa dating 6.5 hanggang anim na minuto sa bilis na 40kph.
- Latest