Call center agent timbog sa credit card modus
Bumili ng P1 milyong halaga ng gift checks
MANILA, Philippines — Kalaboso ang isang 24-anyos call center agent nang madiskubre na hindi siya ang tunay na nagmamay-ari ng credit card sa pamimili ng gift checks na umabot sa halos P1-milyon, sa kilalang international membership supermarket sa Makati City, kamakalawa.
Nahaharap sa kasong paglabag sa Republic Act 8484 (Access Devices Regulation Act of 1998) ang suspek na kinilalang si Aldrich Nunez, residente ng Sta. Cruz, Maynila matapos pormal na ireklamo ng fraud officer ng isang bangko.
Sa ulat ng Makati Police Station, dakong alas-4:28 ng hapon ng Hunyo 10, 2020 nang arestuhin ng security guard na si Fernando Serrano Jr. ang suspek habang ang di pa kilalang dalawang kasamahan nito ay nakatakas sa isang supermarket sa Makati City.
Nabawi sa suspek ang 7 piraso ng gift cards na nagkakahalaga ng P390,000.00, bukod pa sa reklamo na nakabili din umano noong Martes (Hunyo 9, 2020) ng 12 gift cards ang suspek na may kabuuang P600,000.00 sa nasabi ding supermarket gamit ang credit card na hindi naman sa kanya.
Nabatid na naalerto na ang management sa fraud transaction ng suspect kaya ito naaresto.
- Latest