Lola patay, 200 bahay naabo sa sunog

MANILA, Philippines — Isang lola ang patay habang nasa 200 kabahayan ang natupok nang sumiklab ang malaking sunog sa Brgy. Mauway at Brgy. Addition Hills, Mandaluyong City kahapon ng madaling araw.

Ang nasawi na nakilala lamang na si Mila Taon Carillo, 69, ay na-trap sa loob ng kanyang tahanan na nagresulta sa kanyang pagkamatay.

Sa ulat ng Mandaluyong Bureau of Fire Protection (BFP), dakong alas-2:59 ng madaling araw nang magsimula ang sunog sa Nueve de Febrero, Brgy. Mauway.

Mabilis na kumalat ang apoy hanggang sa madamay na rin ang mga bahay sa may Correctional Road na sakop ng katabing Brgy. Addition Hills.

Dahil sa dikit-dikit ang mga bahay na karaniwan ay gawa sa mga light materials, mabilis na lumaki ang sunog. Nahirapan din ang mga bumbero na pasukin ang mga eskinita dahil na rin sa kitid ng mga ito.

Dakong alas-5:40 na ng madaling araw nang tulu­yang maapula ang apoy na sinisiyasat pa ang sanhi o pinagmulan.

Sa ulat ng BFP, 600 na pamilya ang nawalan ng tahanan.