151 arestado sa NOGO
MANILA, Philippines — Nasa 151 foreign nationals ang binitbit ng mga operatiba nang salakayin ang ilegal na online gaming operations sa Brgy. Laging Handa, Quezon City, kamakalawa ng gabi.
Kasalukuyan nang nasa kustodya ng pulisya sa Camp Bagong Diwa sa Taguig City ang mga naaresto at mga ebidensiyang gagamitin laban sa nagpapatakbo ng non-registered offshore gaming operators (NOGO) para sa kaukulang kaso.
Sa ulat na isinumite kay NCRPO chief, P/Major General Debold Sinas, ang operasyon ay isinagawa ng pinagsanib na puwersa ng RSOG, Kamuning Police Station at Criminal Investigation and Detection Group (CIDG).
Matapos isagawa ang surveillance at monitoring, natukoy ang Pineda Building sa Scout Lascano, Brgy. Laging Handa, Quezon City at pinasok ito kung saan nadatnan ang aktibong operasyon ng online gaming dakong alas-8:30 ng gabi noong Martes.
Nasa 133 ang lalaki at 18 ang babae na pawang mga banyaga na nagtatrabaho sa NOGO at sinamsam ang gamit nilang 2,012 cellphones; 149 pirasong computer monitor; 90 computer mouse; 72 computer keyboards; 49 flash drives; 34 na CPU; 19 laptop; 2 printer; isang apple ipad; 20 extension wires; 3 kahon ng cable wires; 2 passport; isang bag na naglalaman ng iba’t ibang identification cards; 15 uninterrupted power supplies; 116 foreign currencies; P213,880.00 cash.10 router modems; isang kahon ng ‘one time password’.
- Latest
