Vico, Koko iba pa pagpapaliwanagin lang-NBI
MANILA, Philippines — Nilinaw ng National Bureau of Investigation (NBI) na pagpapaliwanagin lang nila sina Pasig City Mayor Vico Sotto, Senador Koko Pimentel at iba pang opisyal ng lokal na pamahalaan ukol sa mga panuntunan ng enhanced community quarantine at R.A. 11469 or the Bayanihan to Heal as One Act.
“This is about the implementation of ECQ and the role of local government officials to comply with the guidelines of IATF-IED (Inter-Agency Task Force-Infectious Emerging Diseases)”, ayon kay NBI OIC Director Eric Distor.
“Kapag naipaliwanag na po, we will not insist na po,” pagliliwanag ni Distor.
Nilinaw ni Distor na hindi nila maipadala pa ang liham nila kay Pimentel dahil sa nagpapagamot pa ito makaraang magpositibo sa coronavirus disease (COVID-19). Ipadadala nila ang sulat matapos ang pagkaka-ospital ng Senador.
Bukod kay Sotto at Pimentel, ipatatawag din ng NBI sina Barangay Chairman Emiliano Ramos ng Barangay Talon Uno, Las Piñas City at Barangay Chairman Rodolfo Palma ng Barangay Pag-Asa, Quezon City para sa mga posibleng paglabag sa R.A.11469.
Si Palma ang chairman na nakakasakop sa mga residente ng Barangay Pag-Asa na susugod umano sa Pamahalaang Lungsod para igiit ang pamamahagi ng pagkain ngunit binuwag ang kanilang hanay ng mga pulis at inaresto ang nasa 20 katao.
Sinasabi na pinangunahan ng mga miyembro ng Kadamay ang grupo ng mga mahihirap na residente.
Pinadalhan din ng imbitasyon ang isang opisyal ng lokal na pamahalaan ng Masbate at Cebu City.
Binigyan ang mga opisyal ng hanggang Abril 7, 2020 para magpadala ng kanilang liham paliwanag na tugon sa akusasyon sa kanila.
Related video:
- Latest
