Babaeng pasahero ng LRT-1, tumalon sa riles, sugatan
MANILA, Philippines — Tumalon ang isang 32-anyos na babaeng pa-sahero sa riles ng Light Rail Transit (LRT-1) sa bahagi ng Doroteo Jose Station sa Sta. Cruz, Maynila, kahapon ng umaga.
Ito ang naging paglilinaw ng pamunuan ng Light Rail Transit Line 1 (LRT-1), taliwas sa mga naunang balita na nahilo lamang kaya nahulog sa riles ang pasaherong babae habang papalapit ang northbound train sa nasabing istasyon.
Mabilis namang nakapag-emergency break ang train operator kaya hindi nasagasaan ang nasabing pasahero.
Sinaklolohan siya ng mga tauhan ng LRT-1 at dinala sa Jose Reyes Memorial Medical center (JRMMC) at inilipat sa Medical Center Manila para sumailalim sa x-ray, ultrasound at CT scan dahil sa tinamong head lacerations at gasgas sa mukha.
Naging dahilan naman ito upang maantala ang mga biyahe matapos suspendihin sa loob ng 24 na minuto ang operasyon.
Naganap ang insidente alas-6:45 ng umaga at alas- 7:09 nang ibalik sa normal na operasyon ang mga biyahe sa LRT-1.
- Latest
