35 Chinese sex workers nasagip sa ‘sex den’
Nasa 35 mga babaeng Chinese nationals na nagsisilbing sex workers ng mga kapwa nila Tsinong kostumer ang nasagip ng mga tauhan ng Makati City Police sa ginawang pagsalakay sa isa na namang sex den, kamakalawa ng gabi.
Nabatid na alas-11 ng gabi nang salakayin ng mga tauhan ng Station Investigation and Detective Management Branch at Women’s and Children’s Desk ang Maxx Hotel na nasa Makati Avenue sa Brgy. Poblacion, Makati City.
Sinabi ni Makati City Police chief, P/Col. Rogelio Simon na nakumpirma nila sa kanilang intelligence gathering ang ‘prostitusyon’ sa naturang lugar kung saan pawang mga Chinese workers din ang target na kostumer.
Pinasok ng mga pulis ang ikasiyam at ikasampung palapag at penthouse ng gusali kung saan naabutan ang 35 mga babaeng Chinese sex workers, 21 mga kostumer na Chinese at 10 Pilipinong empleyado.
Natagpuan din ang iba’t ibang klaseng sex toys, mga sexy costumes, sex paraphernalia, tally board at libro kung saan inililista ang kanilang transaksyon.
Patuloy namang inaalam ng mga pulis kung sino ang operator ng naturang sex den upang mapanagot. Hihilingin din ng pulisya sa Pamahalaang Lungsod ng Makati na tuluyang ipasara ang establisimento dahil sa iligal na aktibidad.
Sinabi ni Simon na ito na ang ikaapat na pagsalakay nila sa mga sex den na pinatatakbo ng mga sindikato ng Tsino. Ito ay makaraan din ang pagdagsa ng mga Chinese nationals sa Makati at mga karatig-lungsod.
Dinala na ang mga inarestong suspek sa Makati City Police Headquarters at nahaharap sa kasong paglabag sa Republic Act 10364 o Anti-Trafficking in Person Act of 2012.
- Latest
