Binata nadulas lasog sa truck
LEGAZPI CITY, Albay, Philippines — Nagkalasug-lasog ang katawan ng isang 45-anyos na binata matapos na magulungan ng trailer truck makaraang madulas sa kalsada sa kahabaan ng national highway ng Brgy. Nursery, Masbate City, Masbate kamakalawa ng umaga.
Agad nasawi dahil sa matinding pinsala sa katawan sanhi ng pagkakasagasa ang biktimang si Jonathan Biel Estrella ng nasabing barangay.
Sumuko naman sa mga pulis ang driver ng trak na si George Espares, 50, ng Brgy. Bagumbayan. Sa ulat, dakong alas-10 ng umaga, naglalakad ang biktima nang madulas at gumulong siya sa kalsada.
Sa kamalasan, eksaktong padaan ang Isuzu trailer truck (TUE-449) na minamaneho ni Espares na kargado ng construction materials.
Hindi na nakaiwas ang trak kaya nasagasaan ang biktima ng hulihang gulong nito dahilan para agad siyang nasawi sa insidente.
- Latest
