Bebot itinumba ng 2 ‘tulak’ sa Tondo
MANILA, Philippines — Utas ang isang 40-anyos na babae nang malapitang barilin ng dalawang hinihinalang ‘tulak’ ng ilegal na droga sa Tondo, Maynila, kamakalawa ng gabi.
Idineklarang patay sa Tondo General Hospital ang biktimang si Amy Ignacio, vendor at residente ng Building 22, Aroma Temporary Housing, Tondo.
Nakatakas naman ang sinasabing mga responsable sa pamamaril na kinilalang sina Edmar Boco, alyas Abigael, 19 at isang alyas Aries.
Sa ulat ni P/Chief Master Sergeant Richard Escarlan ng Manila Police District-Homicide Section, dakong alas-9:50 ng gabi ng barilin ng mga suspek ang biktima sa loob ng Building 26 sa Aroma Temporary Housing.
Sa imbestigasyon, dalawang kamag-anak ng biktima ang nagsabing nagpaputok sa ere si Aries habang kausap umano ang biktima na nagsalitang “Bakit ganoon Aries, nagpaputok ka alam mo naman na hindi na ako naggaganyan nagbago na ako…”.
At kasunod naman ang pagbunot ng baril ni Boco at malapitang pinatukan sa kaliwang sentido ang biktima.
Bago tuluyang tumakas ang dalawa ay pinaputukan pa muli ni Aries ang biktima.
Sa emergency room ay nakuha sa bulsa ng nasawi ang 6 na sachet ng shabu.
- Latest