Seguridad sa MRT, LRT at PNR higpitan pa –DOTr
MANILA, Philippines — Iniutos ng Department of Transportation (DOTr) sa pamunuan ng Metro Rail Transit Line 3, Light Rail Transit Line 1 & 2 at Philippine Railways na higpitan pa ang ipinatutupad na seguridad sa istasyon ng kanilang mga tren matapos ang pagkakaaresto sa isang pasahero na nakumpiskahan ng mga bala ng baril sa North Avenue Station sa Quezon City, kamakalawa ng umaga.
Ayon sa DOTr, hindi dapat ipinagwawalang-bahala ang ganitong mga kaganapan para matiyak ang kaligtasan ng mga pasahero at mga tauhan.
Nauna rito, inaresto ng mga pulis sa southbound ng naturang istasyon ng tren si Don Ray Adina, 36, matapos na ma-detect ng baggage scanner, na may dala itong mga bala sa kanyang dalang backpack.
Nang inspeksiyunin ang bag ng suspek ay nakumpiska ng mga guwardiya ang isang magazine at walong piraso ng 10mm live ammunitions.
Si Adina ay nasa kustodiya na ng Philippine National Police Regional Mobile Force Battalion (PNP-RMFB) at sasampahan ng kasong paglabag sa Republic Act 10591 o The Comprehensive Firearms and Ammunition Regulation Act at Omnibus Election Code o gun ban.
“The DOTr MRT-3 assures the public that the incident will not be taken lightly. Strict security measures will continue to be implemented across MRT-3 trains and stations for the safety and security of passengers,” pagtiyak pa ng DOTr.
- Latest