AWOL na parak na wanted sa murder, timbog
MANILA, Philippines — Isang nag-AWOL na pulis, na sangkot sa pagpaslang sa tiyahin ni Efren “Bata” Reyes ang inaresto nang pinagsanib na pwersa ng National Capital Regional Police Office (NCRPO), Regional Intelligence Division (RID), Regional Drug Enforcement Unit (RDEU) at Olo-ngapo City Police sa ikinasang manhunt operation nitong Lunes sa naturang lungsod.
Kinilala ni NCRPO director P/Major General Guillermo Eleazar ang nadakip na si ex-Patrolman Elias Gamboa, 45, dating nakatalaga sa Meisic Police Station, Station 11, Manila Police District (MPD) at nakatira sa Concepcion East Zaragoza, Nueva Ecija.
Ayon kay Eleazar, alas-11:00 ng umaga noong Lunes nang madakip ang dating pulis sa West Bajac Bajac, Olongapo City sa bisa ng warrant of arrest na inisyu ni Judge Tita Bughao Alisuag, ng Regional Trial Court (RTC) Branch 1, National Capital Judicial Region, Manila dahil sa kasong murder. Walang inirekomendang piyansa ang korte sa nasabing kaso.
Base sa rekord ng pulisya, si Gamboa ay isa sa itinuturing na most wanted person at may patong sa ulo na P145,000.00.
Nabatid, na si Gamboa umano ang responsable sa pagpatay kay Victoria T. Pangilinan, alyas Nanay, 60 noong Marso 20, 2005 sa Maynila. Labingsiyam na ulit na sinaksak ng dating pulis ang biktima matapos silang magkaroon ng mainitang pagtatalo.
Ang nasabing biktima ay tiyahin ng tinaguriang hari ng bilyar sa Pilipinas na si Bata Reyes.
Nabatid na nagtago sa iba’t ibang lugar si Gamboa hanggang sa matunton ang pinaglulunggaan nito.
- Latest