22-wheeler truck ‘nagwala’: 3 sugatan
MANILA, Philippines — Sugatan ang isang taxi driver at dalawang pedestrians nang bumangga ang isang 22-wheeler container truck sa concrete post at araruhin ang mga ito sa Ermita, Maynila, kahapon ng hapon.
Ginagamot sa Manila Doctor’s Hospital ang biktimang kinilalang si Ricardo Almedora, driver ng Amando de Guzman taxi at dalawang babaeng pedestrian na inaalam pa ang pagkakakilanlan.
Inaalam pa rin ang kompanyang may-ari ng truck upang matunton ang tumakas na driver at pahinante na nag-abandona sa kalye ng 22-wheeler truck.
Sa inisyal na ulat ng Manila Police District-Vehicle Traffic Investigation Section (MPD-VTIS), dakong ala-1:30 ng hapon nang mawalan umano ng kontrol ang truck habang papaliko sa kanto ng United Nations Avenue at Romualdez Sts., dahilan upang sumalpok ito sa poste at inararo pa ang taxi na nadamay pati ang dalawang babaeng tumatawid.
- Latest
