Metro Manila police inatasang makipag-usap sa Muslim communities
MANILA, Philippines — Inatasan kahapon ni National Capital Regional Police Office (NCRPO) chief, P/Director Guillermo Eleazar ang mga police districts na makipagpulong sa mga pinuno ng mga Muslim communities sa kanilang mga lugar makaraan ang naganap na pambobomba sa Jolo, Sulu.
Sa pagbisita kahapon ng umaga ni Eleazar sa Northern Police District (NPD), inatasan niya si P/Chief Supt. Rolando Anduyan na makipag-ugnayan sa mga pinuno ng mga kapatid na Muslim na naninirahan sa Caloocan, Malabon, Navotas at Valenzuela City.
Ito ay upang mapag-usapan ang mga hakbang para matiyak ang kapayapaan at makabuo ng parehong aksyon para mapangalagaan ang kaligtasan ng bawat mamamayan laban sa mga posibilidad ng pag-atake ng mga terorista.
Ipinaalala ni Eleazar na nananatili ang full alert status sa Metro Manila habang nanawagan sa publiko na maging mapagmatyag laban sa mga kahina-hinalang galaw ng sinuman at makipagtulungan sa pulisya sa pamamagitan ng agarang pag-uulat ng mga pinaghihinalaang tao o gamit na iniwan.
Sa kabila nito, iginiit ng heneral na patuloy ang pagpapaigting ng mga operasyon kontra sa iligal na droga, loose firearms, at pagsasagawa ng 24 oras na checkpoints sa mga istratehikong lugar.
Matapos ang pagbisita, nagtungo naman si Eleazar sa LRT Monumento station at nagsagawa ng inspeksyon upang matiyak na alerto ang mga security personnel at mga pulis na nakatalaga at tama ang isinasagawang inspeksyon sa mga gamit ng mga pasahero.
- Latest