MMDA nag-abiso sa road closure, re-blocking

MANILA, Philippines — Nag-abiso kahapon ang Metropolitan Manila Development Authority (MMDA) sa mga motorista at commuters sa mararanasang trapik ngayong weekend sa ilang lugar ng Kalakhang Maynila dahil kaugnay sa event ng Iglesia Ni Cristo (INC) at sa mga isasagawang  road re-blocking ng Department of Public Works and Highways (DPWH) at pagsasara ng ilang kalye.

Sa abiso kahapon ng Metro Manila Development Authority (MMDA), simula alas-11:00 kagabi  ay sinimulan ang road re-blocking sa area ng  Southbound ng  EDSA mula Arayat St. hanggang Ignacio Diaz (4th lane from the sidewalk), Timog Avenue  hanggang  Kamuning Road (2nd lane from sidewalk) at harapan ng Francesca Tower tapos ng Scout Borromeo (3rd lane mula center island).

Gayundin sa Northbound ng EDSA Vertis North  hanggang  Trinoma Mall (2nd lane mula sidewalk), Batasan Road, Commonwealth Avenue hanggang Kalinisan St. (1st lane), A.H Lacson Avenue, malapit sa Aragon St., Congressional Avenue bago magpanulukan ng Jupiter St. (1st lane), Fairview Avenue  mula Mindanao Avenue  Extension hanggang Jordan Plains Subdivision at  Mindanao Avenue  Extension  (3rd lane).

Matatapos ang road re-blocking sa Lunes (Hulyo 16), alas-5:00 ng umaga at saka lamang ito magiging bukas sa mga motorista.

Samantala, upang  bigyang-daan ang gaganaping aktibidad ng INC ang Lingap para sa Kahirapan’ ilang kalsada sa Maynila ang maaapektuhan. Ang aktibidad ay isasagawa sa Quirino Grandstand, sa Ermita, Maynila.

Ayon sa Manila District Traffic Enforcement Unit (MDTEU), inaasahan ang pagkakaroon ng masikip na daloy ng trapiko kaya pinapayuhan ang publiko na umiwas sa Katigbak Drive, South Drive at Independence Road sa Ermita, simula alas 6 ng gabi.

Gayundin,isasara mula alas -12:00 ng madaling araw sa Linggo ang  Road 10 mula Moriones St. hanggang Delpan Bridge; Bonifacio Drive mula Delpan Bridge hanggang  Katigbak Drive; Roxas  Blvd. mula Katigbak Drive  hanggang  P. Ocampo; East at Westbound lane ng  P. Burgos  mula Lagusnilad hanggang Roxas Blvd.; Finance  Road  mula  Taft Ave. hanggang P. Burgos; Westbound lane ng TM Kalaw mula M.H. Del Pilar  hanggang  Roxas  Blvd; Westbound lane of Pres. Quirino mula  M.H. del Pilar hanggang  Roxas Blvd sanhi ng naturang aktibidad.