‘Goodbye philippines’ sinindihan Lasing, pinasabog ang sarili
MANILA, Philippines – Tuluyan nang nagpaalam ang isang sidecar boy matapos na yakapin at sinindihan ang ‘‘Goodbye Philippines’’ na uri ng paputok, sa Sta. Mesa, Maynila, sampung minuto pagtuntong ng Bagong Taon kahapon ng madaling-araw.
Kinilala ang biktimang si Ronald Vericio, may live-in partner at residente ng Buenos Aires St., Sta. Mesa, Maynila, na nagtamo ng pinsala sa mukha at leeg at tuluyang inatake o sudden cardiac arrest.
Sa ulat ng live-in partner ng biktima na si Kristina Serrano, na lasing na lasing na ang kanyang asawa kaya ayaw na niya itong palabasin at binawalan na rin na magpaputok sa labas subalit tumakas ito at nakisali sa pagpapaputok ng mga kapitbahay dakong alas-12:10 ng madaling-araw.
Dahil lasing na umano ay nakitang nagsindi ng ‘‘Goodbye Philippines’’ ang biktima at niyakap ito na ikinagulantang ng mga nakasaksi dahil pumutok ito sa kaniyang mukha.
Mabilis siyang dinala sa Ospital ng Sampaloc subalit inilipat sa Ospital ng Maynila dahil sa tindi ng kondisyon.
Nabigo naman ang mga manggagamot sa Ospital ng Maynila na isalba ang buhay ng biktima at bago mag alas 2:00 ng madaling araw ay idineklarang patay.
Samantala, sinabi ng Manila Police District-Ho-micide Section na nag-waive ang pamilya ng biktima na paimbestigahan pa ang kaso dahil aksidente lamang ang pagkamatay ng biktima.
“Hindi na itinawag dito sa Homicide yung kaso nung namatay sa Goodbye Philippines kasi hindi naman siguro subject ng medico legal ang kaso para hawakan pa ng imbestigador, marami nga nagtanong sa amin pero hindi na ito hinawakan ng Homicide, ” ani SPO2 Jonathan Bautista.
- Latest