Sumingit sa pila sinita, pedicab driver tigok
MANILA, Philippines - Pinaghahanap ngayon ng Navotas City Police ang isang pedicab driver na sumingit na nga sa pila ay nagawa pang saksakin at mapatay ang kapwa padyak boy na sumita sa kanya, kahapon ng umaga sa naturang lungsod.
Nakilala ang tumakas na suspect na si Aljon Manamba, nasa hustong gulang, ng Tumana, North Bay Boulevard South, Navotas.
Dead-on-arrival naman sa Tondo Medical Center sanhi ng mga saksak sa katawan si Harold Layson, 18 ng Temporary Housing, Tondo, Manila.
Sa inisyal na ulat ng pulisya, naganap ang krimen dakong alas-6 ng umaga sa pila ng pedicab sa Lapu-Lapu st., NBBS. Matiyagang nakapila ang biktima nang singitan ng suspect nang ito na ang kukuha ng pasahero.
Dito nagkaroon ng mainitang pagtatalo sa pagitan ng dalawa hanggang sa mauwi sa suntukan.
Ngunit sadyang hindi palalamang si Manamba na nagbunot ng patalim at pinagsasaksak ang biktima saka mabilis na tumakas.
- Latest
