MANILA, Philippines - Patay ang isang rider matapos tumilapon sa sinasakyang motorsiklo makaraang mawalan ng control sa manibela at tumama sa gutter nang mag-overtake dito ang isang kotse sa Malabon City kamakalawa ng gabi.
Dead-on-the-spot sanhi ng pinsala sa ulo at katawan ang biktimang si Leonardo Asuran, 34, ng Marcelo St., Brgy. Malanday, Valenzuela City .
Sa ulat ng Malabon City Police Traffic Enforcement Unit, alas-6:30 ng gabi, binabagtas ng biktima sakay ng Honda Wave ang Governor Pascual Avenue, Malabon City, nang biglang may mag-overtake dito na isang kotseng hindi na nakuha ang plaka.
Nailang ang biktima at nawalan ng kontrol sa manibela hanggang sa sumayad sa gutter ng kalsada ang gulong na naging dahilan ng pagtilapon nito.
Sa lakas ng pagbagsak ay nawasak ang suot na helmet na naging dahilan ng pinsala sa ulo at katawan nito.