Ex-US serviceman natagpuang patay sa loob ng hotel

MANILA, Philippines - Pinaniniwalaang may ilang araw nang patay ang 59- anyos na ex-US military serviceman matapos matagpuan sa loob ng kanyang silid sa hotel sa Ermita, Maynila, kahapon ng umaga.

Nakipag-ugnayan na ang Manila Police District-Homicide Section sa US Embassy upang ipabatid ang pagkamatay ni William Machett, tubong Washington DC, USA at nanunuluyan  sa Room 106 Ralph Anthony Suite sa panulukan ng Maria Orosa at Engracia Reyes Street sa Ermita, Maynila.

Sa ulat ni PO3 Amelito Lopez,  nadiskubre ni Jennifer Diel, receptionist ng hotel ang insi­dente bandang alas-7 ng uma­ga matapos tunguhin ang silid nito dahil hindi sumasagot sa tawag sa telepono.

Hindi rin nagbubukas ng pintuan kaya gumamit ng duplicate key ang hotel personnel para mabuksan ang pintuan nito kung saan nadiskubre ang biktima na hindi na humihinga kaya isinugod sa  Manila Doctors sa UN Avenue.

Nabatid na dumating ang biktima sa Pilipinas noong Lunes (Mayo 14) kung saan nag-check in sa nasabing hotel at nagbayad ng P14,000 para sa kanyang 10-araw na pamamalagi.

Ayon sa pulisya, maayos ang loob ng kuwarto ng biktima at wala ring nakitang anumang sugat o bakas  na pinahirapan ito.