MANILA, Philippines - Arestado ang isang ginang nang patakasin nito ang asawang may kaso nang aarestuhin ito ng mga pulis sa loob ng bahay nito sa Caloocan City kamakalawa ng gabi.
Nahaharap sa kasong Obstruction of Justice ang suspect na si Amelia Hangibay, 21, ng Phase 4, Bagong Silang ng nabanggit na lungsod.
Ayon sa report ng Caloocan City Police, dakong alas-10:00 ng gabi, ng pinuntahan ng mga pulis ang bahay ng pamilya Hangibay matapos makumpirmang nasa loob ang asawa ni Amelia na si Alfie na may kasong murder.
Sinalubong ni Amelia ang mga pulis at hindi pinapasok kaya nakatakas ang asawa na dumaan sa iba pang pinto ng bahay.
Tila hindi naman nagsisisi si Amelia sa ginawang pagpapatakas sa asawa.