Abogado tinarakan ng holdaper, kritikal

MANILA, Philippines - Kritikal ang isang 29-anyos na abogado makaraang saksakin ng isa sa limang holdaper makaraang pumalag ang una,   kahapon ng madaling-araw sa Pasay City.

Kasalukuyang inoobserbahan pa sa Pasay City General Hospital ang biktimang si Pio Windale Dadas, ng Katuparan Village, Taguig City matapos magtamo ng mga saksak sa iba’t ibang bahagi ng katawan.

Tumakas naman ang limang salarin matapos tangayin ang mamahaling cellphone at wallet na naglalaman ng P2,000 cash at mga IDs patungo sa hindi nabatid na lugar.

Lumabas sa imbestigas­yon ng Pasay City Police, na kabababa lamang sa terminal ng Partas Bus Terminal sa EDSA kanto ng Edang St. ang biktima at nag-aabang na ng masasakyang taksi nang palibutan ng limang lalaki na pawang armado ng patalim.

Puwersahang hinablot ng mga ito ang hawak na mamamahaling cellphone at kinukuha ang kanyang pitaka nang manlaban ang biktima. Dito na hinalihaw ng saksak ng isa sa mga salarin ang biktima saka iniwan na duguan sa semento.

Sinaklolohan naman ng mga tao na nasa lugar ang biktima at saka isinugod ito sa pagamutan.