MANILA, Philippines - Kasalukuyang nakikipaglaban kay kamatayan ang isang 16-anyos na estudyante matapos mabaril sa naganap na rambulan ng dalawang grupo ng kabataan kahapon ng madaling-araw sa Makati City.
Napuruhan sa bahagi ng mukha at ngayon ay inoobserbahan sa Ospital ng Makati ang biktimang itinago sa pangalang Daniel ng Anahaw St. sa Brgy. Comembo.
Sa inisyal na pagsisiyasat ni PO3 Ronald Villaranda ng Makati City PNP station, naganap ang insidente sa kahabaan ng M.H. del Pilar St. sa Brgy. Rizal.
Nabatid na nagsagupa ang magkalabang grupo ng kabataan kung saan kabilang ang biktima sa rambulan.
Sa kasagsagan ng rambol ay biglang umalingawngaw ang putok ng baril kung saan nakitang duguan ang biktima. Blangko naman ang mga imbestigador ng pulisya sa pagkakakilanlan ng suspek habang patuloy ang imbestigasyon.