MANILA, Philippines - Patay ang isang misis makaraang ataduhin ng saksak sa buong katawan ng kanyang mister matapos magtalo sa hindi mabatid na kadahilanan sa Quezon City, ayon sa pulisya kahapon.
Si Jerilyn Laplana, 26, office secretary, at residente sa Gold St., Filinvest II Subdivision, Brgy. Batasan Hills sa lungsod ay iniwan na lamang walang buhay na puno ng saksak sa katawan ng suspect na si Alvin John Momele na agad na tumakas makaraan ang krimen.
Sa ulat ni PO2 Hermogenes Capili ng Criminal Investigation and Detective Unit ng Quezon City Police, ang biktima at suspect ay matagal ding nagsama bilang mag-asawa at sa hindi mabatid na kadahilanan ay naghiwalay ang mga ito.
Ayon kay Capili, wala umanong makapagsabi kung ano ang pinag-awayan ng dalawa, dahil maging ang kaanak nito ay walang nalalamang alitang naganap sa pagitan ng mga ito.
“Ang alam kasi ng mga kaanak ng biktima, ung lalake (suspect) ay nasa probinsya, kaya hindi nila alam kung anong away nila,” sabi pa ni Capili.
Sa pagsisiyasat, nangyari ang insidente sa harap ng Gizon Dental Clinic sa Gate 8 corner San Mateo Road, Brgy Batasan ganap na alas-9:40 ng gabi.
Bago ang krimen, lumabas umano ng kanyang bahay ang biktima para may katagpuin sa labas.Ayon sa isang saksi, napuna niya ang biktima at suspect na nagtatalo sa madilim na bahagi ng nasabing lugar.
Ilang sandali pa, bigla na lamang umanong naglabas ng patalim ang lalake at pinagsasaksak ang biktima sa iba’t-ibang bahagi ng katawan nito. Sa ngayon, patuloy ang pagsisiyasat ng CIDU sa nasabing insidente.