MANILA, Philippines - Agad na nasawi ang isang matadero nang barilin ito ng malapitan sa sentido ng hindi pa nakikilalang suspect habang ang una ay abala sa pagtatadtad ng karne sa loob ng pamilihan, kahapon ng madaling-araw sa Pasay City. Namatay habang nilalapatan ng lunas sa Pasay City General Hospital bunga ng tama ng bala ng .45 kalibre ng baril ang biktimang si Walter Espino 33 at residente ng P. Villanueva St., nabanggit na lungsod. Batay sa ulat ng pulisya, dakong alas-2 ng madaling-araw nang mangyari ang nasabing insidente sa loob ng Pasay City Public Market sa Libertad St. ng lungsod. Ayon sa pahayag ng saksing si Erwin Gulayo, kapwa matansero ng biktima, kasalukuyang inaatado ng huli ang karne ng baka sa isang stall sa meat section nang lapitan ng isang lalaki na nakasuot ng kulay asul na jacket, itim na pantalon, natatakpan ang mukha ng maliit na tuwalya at agad na binaril ang huli sa kaliwang sentido nito. Matapos ang insidente ay agad na tumakas ang suspect patungong Taft Avenue sakay sa isang naghihintay na tricycle na nakaparada sa labas ng palengke. (Rose Tamayo-Tesoro)