Sa kulungan na kahapon nag-Pasko ang isang 19-anyos na ina makaraang arestuhin ito ng pulisya nang pa-singhutin at buhusan nito ng rugby ang 1-taong gulang niyang anak sa Muntinlupa City.
Habang isinusulat ang balitang ito, kahapon ng hapon ay naghihimas pa rin ng malamig na rehas na bakal ang suspect na itinatago sa pangalang “Armie”, residente ng Alabang ng nabanggit na lungsod kung saan posibleng dito na rin ito mag-Bagong Taon dahil sa kinakaharap na kasong paglabag sa Republic Act 7610 o Child Abuse Law.
Batay sa ulat, mismong si Aling “Gina”, ina ng suspect ang nagsuplong dito sa pulisya makaraang makaranas ng pagkahilo at madala sa pagamutan ang sanggol na itinatago sa pangalang “Baby Archie” na unang pina-singhot at binuhusan ng rugby sa ulo ng huli noong Miyerkules ng gabi.
Napag-alaman na mula ng isilang umano ng suspect na lulong sa ipinagbabawal na droga ang sanggol ay nakaranas na ito ng pananakit at pagma-maltrato sa una. Desidido si Aling Gina na huwag patawarin ang anak para umano ito matuto.