Sa dalawang-pahinang resolution na ipinalabas ng DOJ na inaprubahan ni Justice Undersecretary Merceditas Gutierrez, inatasan nito ang Quezon City Regional Trial Court-Prosecutor’s Office na bawiin na ang impormasyong inihain laban kay Eala at sa umano’y kabit nitong si Irene Moje.
Ang pagbasura ng kasong adultery laban kay Eala at kay Moje ay alinsunod sa ‘motion to withdraw petition for review’ na isinumite ni Joselano Guevarra.
Batay sa resolution ibinasura ang nasabing kaso dahil na rin sa kawalan ng interes ni Guevarra na ipagpatuloy ang kaso laban sa dalawa.
Ipinaliwanag pa rin ng DOJ na lumampas na rin sa tama at legal na petsa ang pagsusumite ni Guevarra ng motion kung kaya’t isa rin ito sa naging dahilan kung bakit naibasura ang kaso kay Eala.
Una nang sinampahan ng kasong adultery sina Eala at Moje noong February 2002 sa QC-Prosecution office nang magkaanak ang dalawa noong 2001. (Ulat ni Grace dela Cruz)