Nganong walay mapili
Sakto ang sulti ni Bise Presidente Sara Duterte nga gibisto na niya ang maniobra sa nasudnong budget niadto pang 2024. Pero sayop ang nahinumdoman nga Malacañang ang iyang gipasanginlan nga nagdiktar sa bicameral conference committee sa pagpalusot sa final version sa budget.
Ambot nganong gilubag ang iyang pasangil duha ka tuig nang nilabay: Nga duha ra ka tawo ang nagbuot sa budget --silang Martin Romualdez, kanhi House speaker, ug Zaldy Co, kanhi pangulo sa House appropriations committee. Tungod ba kay napriso na si Martin ug posibleng mahimo niyang alyado si Co?
-o0o-
Kon nakalimot na si VP Sara, giluwatan niyang mosunod nga mga pasangil sa recorded interview sa Office of the Vice President niadtong Septiyembre 10, 2024 human niya gi-isnab ang budget hearing sa House:
• Sa 2023 budget, nangayo ang DepEd (nga iya pang gipangulohan) og ?5 bilyones para sa classroom construction, ?15 bilyones ang giaprobahan sa bicam pero mga kongresista ang nagbuot sa mga proyekto; ug
• Sa 2024 budget, ang gipangayo nga ?19 bilyones nahimong ?26 bilyones pero mga kongresista gihapon ang nanglista ug nangangkon og kredito sa mga proyekto.
-o0o-
Sa iyang pagtulisok ni Presidente Ferdinand Marcos Jr. nga sad-an sa 2024 ug 2025 budget nga gibasura sa Korte Suprema, si VP Sara angay sang mopasabot nganong wala siyay gipakita nga mga ebidensiya sa giingon niyang binuang nilang Martin ug kaubanan.
Kapugngan unta ang mga palusot sa 2025 budget, nga gihulagway nga maoy labing kurakot sa tibuok kasaysayan. Mas sayo untang napasakaan og kaso ang mga kawatan kon gi-dokumento ug ginganlan pa ang mga kongresista nga naka-komisyon.
-o0o-
Ambot gitapolan ba, o dili kamao sa paghipos og mga ebidensiya, o nalingaw sab sa pagtago sa minilyon ka pesos niyang confidential funds ug mas daghang kuwarta sa iyang bank accounts.
Pero ang pagkapiit ni Marcos Jr. sa budget ug ang gipasangil nga mga anomaliya batok ni VP Sara nakapahinumdom sa katawhan nganong walay mapili sa duha ka kinatas-an nga mga opisyal sa nasud: Presidente nga inutil pagbadlong o kakonsabo sa grabeng kinawatay sa iyang administrasyon; nga nagpabilin lang sa puwesto kay ang bise presidente gawas nga balhibuon og kamot gikahadlokan nga uhaw sab sa dugo.
- Latest
