Pasagdi, ayaw apasa

Dear Tito Miguel ,

Ako diay si Hannah, taga Barangay Guadalupe, Cebu City. Akong boyfriend ba kay isip bata man uy, sa una medyo madala ra nako ang iyang kinaiya. Pero karon, nagkagrabe man uy, gamay nga bikil, mangluod dayon. Gikapoy na baya ko og adjust, pero love man nako siya . Unsa akong buhaton Tito Miguel para mausab siya ?  — Hannah

Hannah,

Lisod usbon ang batasan sa tawo, labi na’g wala sila’y nakitang dautan sa ila binuhatan. Kasagaran sayop sa manag-uyab o magtiayon kay ila usbon ang usa’g-usa, nalimot nga dagko na sila nagkita. Buot pasabot ang pagkatawo dugay na namugna sa pamilya, silingan, simbahan, eskuylahan, trabahoan ug uban pa. Angay ra unta dawaton o sabton ang batasan labi na’g madala ra sa pasensiya ug pailob. Apan dili sab pasabot pasagdan na lang labi na’g duna nay kalapasan. Angay na sad badlungon kun bastos na, suklan kun ikaw dagmalan, o biyaan kun dili na nimo makaon ang batasan.

O dili ba kaha nagyagyag na mo sa sugod unsay dili ninyo ganahan. Sama sa pamakak, pagluib o panlingla, mao ni gitawag nga non-negotiables sa usa ka relasyon. Ang iyang ka luoran kiligon ka sa sinugdanan, buot pasabot ganahan diay siya imong hataga’g importansiya, pagtagad ug prayoridad.

Apan kun gamay nga bikil mangluod lang dayon, mora na siya’g batang gamay nga sige lang nimo am-aman. Kapoy na, di ba? Pasagdi kun mangluod. Ayaw tagda’g apasa, ayaw am-ami. Mohupas ra na iyang pangluod, siya ra mismo mopatim-aw’g balik nimo. Dawata nga daw wala’y nahitabo, ayaw hisgoti ang niagi. Kay kun imo hisgotan, mobalik na sad mo sa rason nga iyang giluoran. Epektibo gihapon iyang patagad. Kun dili mobalik o makig-uli, buot pasabot nibiya na kanimo. Lagmit ikaw ang dili makaantos. Kun imo pangitaon, siya magmalamposon, iyang pangluod gigamit niya aron ka patuyok tuyokon.   Tito Miguel

Magpatambag ka? Ipada kang Tito Miguel: 0998-581-5856