Pipila ka rason

Dear Tito Miguel,

Suking reader  ko sa imong column dinhi sa Banat News.  Ako diay si Kalixta , taga Mabolo ,Cebu City .  Kun molaag gani ang akong boyfriend kauban ang iyang  barkada kay dili gyud ko paubanon . Permi ko mangayo sa iyang rason, pero dili siya moklaro og tubag . Ang ending mao na hinoun ang lalisan namo permi. Kun Ikaw ang pasultion Tito Miguel, unsay tan-aw nimo kun nganong  dili gyud ko paubanon sa iyang mga laag?  — Kalixta

Kalixta,

Depende kun gipaila-ila na ba ka sa iyang barkada o wala pa. Kun kaila na mo apan dili ka pakuyogon sa ilang lakaw, dunay pipila ka rason. Basin for the boys lang. Ayaw’g suksok, nagsabot sila wala’y kuyog nga pares aron way mamantay ug mamadlong nila. Kun duna may kuyog nga babaye, basin barkada na nila daan, dili gusto masagulan kay usahay hasol makibagay sa bag-ong kaila, basin sa ilang binuang ug bugal -bugal dili kasakay. Mawala ang lingaw. Apan kun dunay bag-ong kuyog nga babaye, basin ma’s gaan to sila, mura’g one of the boys, mo-jam sa grupo sa mga lalaki nga wala’y malisya, kasakay sa ilang binuang ug bisyo, kun duna man.

Basin hadlok siya pabigat ka sa grupo, sige ka’g bantay ug badlong niya, dili ka mo-jam sa iyang grupo, maghilom-hilom ra ka unya sige’g agda manguli na. Unya ini’g uli mosukna ka, toxic di ba. Posible sab hadlok imong uyab magselos ka didto. O dili ba kaha duna sila’y milagro nga dili ka angay makahibalo.

Basin sab naka-timing ka’g uyab nga mobahin sa panahon. Kun laag kuyog mga classmates o katrabaho, sila ra. Kun kuyog mga barkada, sila ra. Kun pamilya, sila ra. Kun uyab, kamo ra. Aron tutok iyang atensyon.

Apan kun wa pa ka gipaila-ila, wa ka makakita kinsa sila, posible duna siya’y tinagoan, o dili ba kaha dili ka niya ikapasigarbo. O hadlok siya unsa ilang ikasulti bahin nimo. O ikaw bahin nila. —Tito Miguel

Magpatambag ka? Ipada kang Tito Miguel: 0998-581-5856