Tito Miguel

Dear Tito Miguel ,

Ako diay  si   Arjan, 28 years old, bisexual ug nagtrabaho isip call center agent.   Simple ra gyud akong problema ,  mangayo lang ko nimo og tips aron ma-learn nako  og love akong girlfriend nga si    Neesha, 28 years old nga nagtrabaho sa usa ka pharmacy.

Dili gyud malikayan  nga maganahan gyud ko og lalaki , pero naningkamot ko nga mo-focus gyud ko sa girl.

Walo ka bulan na ang among relasyon ni Neesha. Kahibalo ko nga magkatawa raka sa akong problema Tito Miguel, pero gi-pressure man gud ko sa akong family nga kinahanglan babaye gyud ang akong  uyabon.

Kahibalo sila nga bisexual ko, ug na-pressure ko sa ilang order. Unsa akong buhaton Tito Miguel aron makat-on ko nga ma-in love og babaye?  Pasensya na sa akong stupid question, pero  masaligon ko nga makatabang ka sa akong sitwasyon.

Arjan

* *  *

Arjan,

Simple ra sad ang sulbad sa imong suliran, ayaw pugsa imong kaugalingon pagkat-on ma in love sa babaye o ni bisan kinsa pa man. Ang kasingkasing dili angay but-an, kalit ra ni nga mopitik sa wa’y hinungdan.

Kay bisexual man ka, duna ka’y igong katakos nga tiunay mahigugma og babaye.Apan sa imong uyab karon duna ka’y kinahanglan pagkat-on unsaon ma in love niya nga siya ra gyud, buot pasabot imong gibati para niya dili pa hingkod. She is not yet the one, sa laktud.

Paminawa’g maayo imong kaugalingon kun nahigugma ba gyud ka niya, kay basin na pressure lang ka sa imong pamilya.

Ikaw ra ang bugtong makahukom kinsa imong higugmaon.

Mahimo kang maminaw sa tambag sa pamilya ug mga higala, apan ang kina-ilawman sa imong kasingkasing maoy sunda.

Apan kinahanglan makahibawo imong girlfriend unsa’y imong sexual preference aron duna siya’y igong kaalam sa paghukom kun kanimo mopadayon, taliwala saposibilidad nga mangita ka’g sama nimo samtang nagtuo siya nga kamo eksklusibo. Ayaw ipadayon inyong relasyon nga duna ka’y gitagong pagnanasa sa sama nimo nga lalaki kay kini nga pagbudhi moguba sa iyang kinabuhi. Isulti niya unsa imong tinuod nga gibati. Ayaw ihikaw ang kamatuoran nga tingali makapausab sa iyang kapadulngan.

Betray no one, man or woman, especially a woman whose only fault is to love someone she thought was all man.

Tito Miguel

*  * *

Alang sa inyong mga suliran nga buot ninyong patambagan kang Tito Miguel, -i-like ang Banat Hugyaw ug Banat News fb pages aron adto ninyo kana ipadala ug mogawas kini matag Lunes ug Biyernes.